用自己既感覺睇自己:
任性, 大膽, 衝動, 任意妄為, 唔理人感受, 甚至連自己既感受都唔理, 唔理後果, 甚至唔諗後果. 經常跌入情緒陷阱, 不能自拔. 越失落所以越快樂. 善於令自己唔開心, 擔當受害者角色, 演譯痛苦情緒. 去到谷底又想反彈, 彈唔起想揾人幫, 但係冇人幫到, 因為最唔想起身既其實係佢自己. 自己玩自己. 覺得唔會有人明白佢, 但係其實諗深一層, 佢其實都唔需要人明白. 口不對心, 因為有時佢自己都唔係好清楚自己個心諗咩, coz佢個心好free flow, 冇人管, 冇人理, 自己都唔理. 鐘意玩火, 試底線. 成日鐘意埋啲唔適合自己既野, 包括生物同死物.
從第三者角度睇自己:
非常感性, 好鐘意啲artistic野. 得意, 搞笑, 可愛. 有時會好執著, 但一旦諗通又放得好開. 所以有時會有好大落差. 好多野諗. 成日諗埋啲不切實際, 天馬行空野. 滿腦子幻想. 不懂得釋放自己同情緒. 要佢放過自己, 同埋唔好追住啲情緒跑, 唔好俾啲情緒纏住係好難。細路女脾氣, 要tum, 但係好易tum. 都幾愛恨分明. 工作既佢同私底下既佢有啲位好唔同.
雖然佢個人飄忽如幽靈, 好多人都唔明白佢, 覺得佢好難捉摸, 但係其實好簡單直接, 同佢相處唔需要轉彎抺角, 你要知佢既心意其實好簡單, 直接問, 雖然有時佢答左, 你都唔明, 或者佢唔鐘意答會唔答；又或者直接give her an order, 佢有幾obey, 有幾排除萬難去完成呢個instruction, 你就知佢對你有幾重視. 佢係嗰種為左自己鐘意既野就在所不惜既人, 佢鐘意起上黎真係咩都夠膽死, 不過佢鐘意就鐘意, 唔鐘意就唔鐘意, 連佢自己都改變同選擇唔到, 佢啲喜好絶對唔logic, pure emotion.
唔好估佢, 唔好憑佢啲行為同言語, 甚至細微動作, 意識型態, 態度等等去猜度佢, 唔好旁敲側擊, 因為咁就同捉空氣一樣, 你一來唔會get到, 二來俾佢發覺你咁樣, 佢會覺得好討厭, 會唔信任, 同唔想同你溝通.
在乎他人對佢既心意多過物質好多，有時你會覺得佢唔在乎你送俾佢既野，因為佢個人既著眼點係你，而唔係件野。而更ultimate既重點係，佢鐘意你有幾多，唔係你對佢付出有幾多，更加唔關份禮物事。話雖如此，其實你對佢既付出佢係知道同會appreciate既。
需要空間, 唔好迫佢, 唔好俾佢覺得你想控制佢, 咁樣佢會好辛苦. 唔好以為可以欺騙到佢, 你個問題背後係想控制, 想猜度定係關心, 佢會感覺到. 記住, 佢係用感覺, 唔係用logic去分析同理解. 需要commitment and stable, 雖然佢自己超唔stable.
優缺
優點係好能夠感受, 富同情心, 做起野上黎好實事求事, 分析得好清楚, 大部份人會聽佢講同buy佢. 工作上, 只要俾佢知道自己個問題係邊, 會即改, 雖然on and off會反彈, 但俾啲時間佢, 佢會堅持fix it up為止. 缺點係好容易鑽牛角尖, 成日搞到自己唔開心, 講野太直接, 無顧及人感受, 無分尊卑, 尤其是做野既時候, 因為當佢focus係件事上面, 佢為件事好就唔諗咁多, 所以大家都覺得佢係一隻辣椒仔.
特技
靈魂出竅 – 越飄忽既時候其實越專注, 專注於佢飄左去嗰樣野
同一時間一心幾用 (都係有呢個天賦先讀到即時傳譯)
扮唔驚 – 驚既時候個樣會好淡定, 非常驚既時候仲會笑 (驚到笑, 呢個on stage既時候好好用)
喜惡
鐘意同屋企人或朋友去食好野。鐘意食雪糕. 鐘意睇野, 睇書, 睇畫, 睇漫畫, 睇戲, 睇人……鐘意人(類), 鐘意對人好, 鐘意關心人, 鐘意幫人，尤其是係佢覺得less fortune既人. 鐘意戰爭歷史類既戲文。鐘意同小朋友玩, 同小朋友相處.
唔鐘意陰險既人。唔鐘意冇義氣既人。唔鐘意落雨。唔鐘意帶遮。
信仰
信主之後個人改變左好多，包括：1 同屋企人既關係、2 唔再小氣、記仇同玩報復（呢點都幾勁，因為呢個特點係家族遺傳），改為寬恕同忘記、3 愛自己、原諒自己（呢個仲學緊, 不過睇黎都七七八八）、4 交託 （還在升呢中）、5 喜樂 （努力中）。
目標
使我作祢和平之子
Be the best person that you can be
夢想
仲揾緊……
放鬆既方法
做yoga, 飲咖啡, 影相, 瞓覺, 同7仔玩
