誰是罪人? (約翰福音 8:1-11)

係約翰福音第八章1-11節記載左一個咁既故事.

耶穌去到聖殿, 班文士同法利賽人想試佢, 想揾機會同藉口入佢罪, 就帶左一個淫婦黎, 呢個淫婦仲要係俾人捉奸在床, 斷正嗰種. 佢地問耶穌, 摩西定落黎既法則吩咐我地用石頭打死呢個淫婦, 你話應該點處置佢呢?  耶穌無理佢地, 彎身係地下用手指寫字. 佢地見耶穌唔答, 就不停追問, 耶穌企返起身, 同佢地講, 你地邊個覺得自己無做錯過野, 係無罪既, 你地邊個咪首先攞舊石頭去掟佢囉. 然後又彎低身, 繼續係地下寫字. 嗰班人聽完個答案, 由老至少, 一個一個咁行返出去, 直到最後得番耶穌同嗰個女人. 耶穌起番身, 同佢講, 嗰啲人呢? 無人定你罪咩? 佢話: 主呀, 無. 耶穌話: 咁我都唔定你罪, 你走啦, 以後唔好再犯啦.

呢個係一個耳熟能詳既故仔, 好出名, 好多人聽過. 我記得好耐之前睇黃子華棟篤笑, 佢都引用過. 但係聖經既有趣之處就係, 你唔同既時間睇都會有唔同既領悟, 就好似睇金庸啲小說咁.

呢段故仔我最鐘意既地方係個男主角好有型, 擺明嗰班人就走黎跣你, 裝你入局, 佢睇穿哂都唔止, 仲要唔睬佢地, 彎低身係地下畫字, 真係型到爆. 嗰班友仲要唔識死, 仲要追問喎, 自己”瘀”左都唔知, 真係蠢到呢唔知點講好. 耶穌淨係講左一句, 全部都收聲死返出去, 型到震. 咁dramatic既故仔, 咁好既台詞, 難怪留存千古.

呢個故仔最多人討論既point係, 你地邊個無罪就掟死佢/定佢罪. 我地邊個無罪, 個個日日都犯罪, 你認同唔認都好, 你知或唔知都好, 你扮知或扮無知都好. 罪唔係講你根據大英律例或者基本法, 你有冇犯罪咁簡單. 屈枉人唔係罪? 以權謀私唔係罪? 缷膊唔係罪? 擺人上枱唔係罪? 講一套做一套(即係講大話啦)唔係罪? 助紂為虐, 容讓不公平, 不公義繼續又唔係罪? 埋沒良知唔係罪? 埋沒人性唔係罪? 唔係罪?! 唔係罪. 呢啲簡直係傷害他人甚至謀殺, 如果呢啲唔係罪, 咁唔係罪囉. 學鼓佬話齋: 大話講一百次就變真話架啦. 如果你自己真係可以忘記真相係咩既話……講真, 我好多時都想打暈自己.

我地個個都唔得閒睇下自己有幾衰, 因為我地忙住去睇下其他人有幾衰, 去話人, 去批評其他人有幾衰, 我地同啲文士同法利賽人有咩分別.

唔順氣呀, 攞舊石頭去掟人啦, 日日都做架啦. 我而家都做緊.

呢個故仔另一個重點係婦人同耶穌既對話中. 你明明係一個罪人, 然後又冇人定到你罪, 等個天收你, 但係佢話你走啦, 我放過你, 你唔好再犯啦. 故事中既婦人可能真係帶住感恩返屋企, 重新做人. 但係現實中有幾多人, 個天唔收佢, 佢就沾沾自喜, 以為逃得過最後既制裁. 師主, 懸崖勒馬, 回頭是岸, 神雖然係滿有慈愛, 擺明你有罪, 佢都可以放過你, 佢有超級耐性等你返去, 但係唔代表佢容讓你利用佢既恩慈同耐性. 不要自欺, 神是輕慢不得的. (加拉太書6:7)