必然之選-飲茶篇

今早去了驗血, 之後去了飲茶, 難得給我撞中間必然之選.

能夠成為心水選擇的食肆不少, 不過要成為必然之選就不多, 其實so far在我心目中都只有寥寥數間, 可幸今天遇到一間, 實在值得記錄一下.

這間便是新晋成為我的飲茶必然之選既麒麟閣, 位於銅鑼灣利舞台頂樓. 究竟佢有咩好?

首先, 環境舒適, 空間分配不錯, 我今天坐近窗位置, 感覺闊絡.

其次, 招呼不錯, 侍應生都很醒目, 就連捧點心的老爺子都整齊企理, 銀白平頭裝,衣履都潔白筆挺, 更遑論其他經理級的職員.

第三, 踏進去, 舉目一望, 食客都是叔父輩又或是闊太團, 看來這家店子都有啲料到.

不過, 我個人最注重的都是食物質素和食物味道, 又不是吃那些環境呀, 侍應呀落肚, 所以我們還是入正題吧.

這裡的選擇繁多, 不只是點心, 粥粉麵飯等的 a la carte, 就連套餐的選擇也很豐富. 我個人飲茶一向都喜歡散叫, 奇怪今天竟然給我選左個套餐, 歸根究底還是錢作怪, 覺得佢個套餐很抵, 而且也蠻合意. 我們今天選的是四人餐, 盛惠HK$168, 可在十多個點心中選6個, 6個炒粉麵中選1個, 然後在4個菜中選1個.

其他套餐選擇包括: 四人四小菜餐, 又是168. 單人餐: 有灌湯餃(或其他兩種點心) + 粉麵 + 菜 + 甜品, HK$58. 還有其他數種不同配搭的套餐可供選擇.

講返今日餐晏, 先上菜的是鮑汁伊麵, 伊麵彈牙爽口, 配以白菜仔, 銀芽, 蘿蔔絲, 最重要的是沒有出面的濃重味道, 很有健康家庭風範, 汁多而不油, 平凡中見真章.

第二道是白灼菠菜, 需知道真係越簡單的菜式就越難做得好, 這個菠菜實在令我很欣賞. 好在哪裡? 就是菠菜有菠菜味. 什麼? 菠菜唔係有菠菜味難道有西洋菜味? 我唔係咁既意思. 大家唔知有無發覺而家食菜, 真係好耐都冇試過食到菜味. 如果你買有機菜返屋企煮可能會好一點, 食到有菜味既菜其實唔係咁容易. 不論中外, 上乘的菜式都多是可以帶出食物本身的味道, 而不是用花巧的汁醬刺激味蕾. 而呢道簡簡單單既菠菜就正好做到呢一點, 另再配上少少味覺上的點綴. 這道菠菜, 香淋滑, 有菠菜味, 上湯實而不華, 只帶出菜的味道而不見湯的味道, 再配上一絲絲的雲腿作最後點綴, 香而不咸.

之後陸逐有來的是點心:

蝦膏吊筒: 沒有厚叠叠的蝦膏, 雪白的吊桶上只有以蝦膏調味的痕跡, 而且吊桶並非只有圓桶, 連桶尾的兩翼也有保留, 這種貨真價實的原隻吊桶, 在點心中實屬罕見.

蘿蔔糕: 我一向喜歡香口, 見到來的是蒸的不是煎的, 初時有微微失望. 一湯匙插進去, 咦, 不是軟軟的? 心裡想, 看來粉多蘿白少耶. 誰知, 整件白白的蘿白糕 (我拿的剛好是一粒瑤柱和臘腸也沒有), 竟然滿載白蘿蔔的芳香, 眼看以為略乾身的糕, 竟然一點也不乾, 像是有湯汁煮過再蒸一樣. 好食到看不出是對這蘿蔔糕的評價.

潮州粉果: 外皮厚薄適中, 少少q, 外間很多都做得太厚. 微辣, 香口, 花生脆, 用料平均, 數一數二的好.

咸水角: 很少吃, 不過未試過咁好的. 熱氣騰騰不在話下, 外皮清脆, 乾身, 係可以咬落去卡一聲的那種 (唔係卡樂B). 難得的是內皮(白色部份)比坊間厚, 煙韌而甜. 咸中有甜, 本來就是咸水角的精髓, 奈何坊間的皮做得總是不夠好. 這個炸物放涼了仍好吃, 不標油.

牛肉: 不是我愛吃的點心, 不過看得出愛吃牛肉的父親大人非常欣賞, 說是手打, 牛肉又好靚.

叉燒酥: 坊間都有不少做得好的, 不過呢個真係鬆化得沒話說, 一口咬下去, 四個字, 香酥鬆化.

最後還奉送自家製甜品, 可選: 木瓜雪耳, 紅豆沙, 合桃露和豆腐花. 今天唯一不太好的是豆腐花, 因為不夠熱. 紅豆沙, 有陳皮香而冇陳皮澀, 屬上品. 其他各樣未試過便不敢評.

本來我們只得三人, 加上我打緊化療, 胃口不佳, 實在沒想過會食得哂, 本來係打算打包好多, 但竟然係咁既情形下我們都吃了9成5, 足證有幾好味.

**********************************************************************

隨附其他必然之選一覧

飲茶: 銅鑼灣利舞台麒麟閣

喜慶: Hugo (我知而家冇左, 十二月會開返, 留定肚等)

貴價自助餐: Conrad Brunch Buffet

中價自助餐: Marriott

平價自助餐: Royal Garden Greenery (不過近期裝修緊)

燒鴨: 清真惠記

終於有個好消息

今天是萬勝節, 身為基督徒, 實在不主張慶祝的, 不過, 我還是慶祝了, 為的不是鬼怪, 而是最新的PET Scan報告.

這已經是第三次照PET Scan, 養和PET Scan Dept的職員都認得我了, 這次的心情當然不比第一次緊張, 因為駕輕就熟了, 針打得多, 現在都不太覺得痛. 一切一如往常, 不同的只是報告出得特別快.

昨晚心情還有點緊張, 多得楣兒和春巴在和我說說笑笑. 今天一早我們一家便起程前往醫生診所.

入到醫生的辦公室, 他的面色不太好, 我的心也涼了一截, 心裡在安慰著自己: 不要緊吧, 無論如何都是要面對, 要醫的. 坐下之後, 醫生說, 有一個好消息, 有一個壞消息. 我們先看好的. 然後我們坐著看PET Scan 的結果, 左右兩邊肺的小點, 變得更更更小了, 只有幾mm, 加上細胞的活躍指數很低, 所以, 根據這些數據, 我們不能再確認它們是癌細胞. 另, 肺淋巴之前也有細胞活躍指數偏高的情況, 這次的PET Scan顯示, 這指數也下調了, 即, 細胞活躍度很低, 所以, 根據這些數據, 我們也不能再確認裡面有癌細胞.

老實說, 一面聽我就一面驚, 因為如果肺算是好了, 這次化療算成功了, 那壞消息…….? 一面心急一面又耐心地聽完醫生的講解後, 便認不住問, 那壞消息呢? 媽也忍不住衝口而出說, 身體其他地方呢? 有沒有?

醫生答: 沒有沒有…壞消息是還要做化療. 我心想: 還要做化療都算壞消息嗎? 哈哈哈….我預左還要做兩次的, 醫生, 你上次不是說過嗎, 即使今次驗檢結果良好, 也還是要多做兩個療程, 以防萬一, 斬草除根.

我忍不住在醫生面前捏一把汗, 真是的, 我還在怕…..

但, 未先未先, 醫生你這次說做多兩次是什麼意思, 是做多兩次便算完, 還是做多兩次, 再驗, 如果沒事又多做兩次呢?

醫生說, 我們先再做兩次, 再驗, 再比較報告, 如果和今次一樣, 或者更好, 那我們都算是成功了.

Oh, thanks God, 那即是康復之期指日可待了. 謝謝大家一直以來替我擔心, 替我禱告.  2010年的檔期我已經準備好了, 之前我答應過大家的, 或是大家答應過我的都將可兌現啦! 快來預約檔期吧!

P.S. 主, 感謝你, 冇你照住, 我就冇今日. (因他受的鞭傷, 我們得醫治. 以賽亞書53:5)

秋日

終於等到秋天, 一年之中最美好的時光. 和暖而不灼熱的陽光, 秋風隨來, 爽而不膩, 這個時候人像身輕如燕, 躍躍欲飛. 飛? 到哪裡去?

最好, 當然是乘風破浪, 坐船出南丫島, 30分鐘船程, 吹飽海風, 人也精神點. 然後下船去食餐靚海鮮, 杯盤狼藉, 便再走去找亞婆豆腐花, 肚滿腸肥, 便走到人少少的海灘, 一邊晒太陽, 一邊嘆書去. 日落黃昏, 拖著懶洋洋的身子, 到南島書蟲 (Bookworm Cafe) 再嘆杯咖啡, 吃些西式素小點, 再啃書.

咁樣先至叫享受生活.

難得不用上班, 可惜還是在莊周夢蝶.

第二個療程

10月9日, 星期五, 早上醫生來電, 說化驗報告已出, 可否下午便來打化療? 雖然有點突然, 比預計之中早了一天, 不過也無不可, 所以便立即吃藥 (醫生預早給的胃藥, 類固醇和止嘔藥), 預備下午去.

人剛退燒, 其實還是有點累累的. 醫生說腎的指數不太好, 我們這次療程要轉另一隻藥, 對腎的傷害沒那麼深, 不過藥力亦無咁勁. 好消息是, 這次只打兩針, 9號一針, 16號一針.

那天, 我們在診所裡看了葉問和機動部隊-伙伴兩齣戲, 葉問比較好看. 就這樣, 我們由下午2時坐到大約下午5時半便離開診所了.

這次打針的心情和上次很不同, 雖然沒什麼難受的地方, 但人總是很小心, 就是一累便睡, 休息, 也不敢周圍走, 甚至朋友的探訪也推了. 原因其一, 是上次發燒的經歷. 其二, 是不知怎的, 心裡總想著這是最後一次了, 不能功虧一簣, 就好像預備考試最後衝鋒刺的樣子.

打多一針, 休息好, 再到醫院照pet scan, 如果沒事, 便算我嬴. 再多捱兩個療程便大功告成, 所以這個時候, 真的不想有什麼差池.

Pet Society之貼紙簿

雖然出左釣魚function, 不過大家好似又好快意興闌珊, 所以今次佢出左本貼紙簿.

我有時真係好懷疑, playfish裡面有個員工應該係香港人, 因為時不時我都會留意到有d香港完素, 例如今次呢本貼紙簿.

我記得係好細個既時候, 我地都玩過類似既貼紙簿, 當時叫集圖冊, 係文具舖有得賣, 有好多唔同既款式. 我記憶之中有barbie集圖冊, 又有恐龍集圖冊, 機械人嗰d好似都有. 總之當時大家就求阿媽買, 買完呢, 因為要儲入面d貼紙嘛, 所以又時不時求阿媽買一包包既貼紙. 我記得大約一包有五張. 你睇, 我諗當時真係好細個, 連零用錢都未有, 要求阿媽買, 哈哈….

咁d貼紙就梗係有重複, 重複左, 就同同學仔交換啦, 不過, 我記得其實都交換唔到咁多, 然後就成屋都剩返哂d貼紙…最後當然又係扔掉.

今次呢本貼紙簿, 大家唔洗再叫阿媽買貼紙, 因為朋友仔會send貼紙俾你, 大家每日都send d貼紙俾人, 咁就好快儲到. 不過重複既貼紙冇得同人交換, 只係可以攞去recycle. 當然又係會有d罕有貼紙, 大家會努力d先儲到.